Read God's Word: the Bible

  • What does this tell you about God?
  • What does this tell you about Jesus?
  • What does this tell you about people?
  • If this is true, what difference would it make in your life?
  • Who are five people who you can share your discoveries with?

Luke 3:1-38

1Yuunseaa n daa paai, zaŋŋi n-kyaŋŋi yuuma piiya ni anu NaaTaibiriyusi ŋↄn daa zinni Room NaaTitaari naam gbana zugu la. Di saha maa ka Pↄntiyusi Pailiti daa nyɛ Gyuudiiya tingbaŋŋu Gↄmna, NaaHɛroodi mun daa di Galilii naam, ka u beeri Filipi mun daa di Ituriiya ni Tirakↄnaati m-paasi, ka Laasanyasi mun daa di Abiliini naam. 2Saha kanŋↄ yaasa ka Annasi ni Kayafasi daa di Izraɛli dima gyeeŋŋu suulinsi. Di daa nyɛ la saha kanŋↄ ka Naawunni daa tↄ'asi n-ti Gyↄni, sↄ ŋↄn daa nyɛ Zakariiya bii la, yoo ni sa. 3Dizugu ka Gyↄni daa kyaŋŋi n-gyinni Gyↄdin mↄ'ari ziiya gyilagyila ni, m-moonni n-yɛtti, ni, "Ya kyɛli ya teesibeeri, ni ya tumbeeri tuma, m-basi. Ka lala zugu ya kyɛm na ka man nin su ya Naawunni koom, ka Naawunni nin kyɛ ya taalli zaa m-pɛŋŋi ya." 4Di zaa daa nyɛ hoo Anabi Aizaaya ŋↄn pun sↄbi u bukku maa puuni n-yɛli seem la. U daa yɛnni, ni :- "Ya wumma! Sↄ m bɛ yoo ni n-tasira, Ni, 'Ya maalim ti Dugma palli n-ti u, Ya sɛ'asim u sↄya zaa ka a tuusi kyappi; 5Baa kam zaa nin ti nyɛri, Ka zↄya ni kunkuna zaa nin birigi n-sigi; An gↄlim zaa nin teaai, Ka sↄgbiragbira la mun leebi bↄlibↄli; 6Ka ninsaala zaa nin ti nya M-baŋŋi Naawunni ŋↄn nin tuligi u niriba seem la.' " 7Tↄ; ka daadam daa la'am Gyↄni saanni na pam, ni u su ba Naawunni koom. Ka u daa yɛli zama maa, ni "Ya bunkyↄ'ama wa! Ya kur ŋmani la hoo wa'abeeri! Ŋↄni n wulisi ya Naawunni ŋↄn ya namsi ya seem ka ya yɛnni, ni, ya nin zↄ n-yi namsigu maa ni? 8See ka ya tum tunseesi an wulisi, ni, ya pun takki ya halibeoo ni ya teesibeeri zaa, kaman tisuŋŋu ŋↄn wanni walisuma seem la. Yan di yɛtti taaba, ni 'Ibrahim ya'ansi n nyɛ ti!'; ya bu baŋŋi, ni, Naawunni nin toaai n-zaŋŋi halli kuga wa gba m-maali ya'ansi n-ti Ibrahim? 9Pampaŋŋↄ ka Naawunni nin namsi tumbeeri dima hoo nira ŋↄn maali u leefu siri ni u ŋma tiseaa kan bu wanni suŋŋa seem. U nin ŋma ka n-lusi, ka zaŋŋi ka n-lↄsi bugum ni." 10Gyↄni ŋↄn daa tↄ'asi lala maa, ka zama maa niriba daa boosi u, ni "Ka dizugu ti ya niŋi la wula?" 11Ka u labsi n-yɛli ba, ni, "Ŋↄn mari kpari ayi ŋↄn yiisim yinni n-tisi ŋↄn pun ka halli yinni. Bee ŋↄn mari bundirigu gba ŋↄn purim di lala." 12Tↄ; ka lampodeaariba gba daa kyɛ Gyↄni saanni na, ni u su ba Naawunni koom maa. Ba daa boosi u, ni, "Ti Karimba, ka wula ka tirima ya niŋi?" 13Ka u daa labsi n-yɛli ba, ni, "Ya di deaari n-yakkri ban wulisi ya seem maa." 14Soogyadima gba daa boosi u m-paasi, ni, "Ka tirima ŋↄna?" Ka u daa yɛli ba, "Ya di mugsiri sↄ n-deaari ligri bee n-galimni sↄkam yↄriyↄri; ka ya kyɛ ka ya nini tigi ya yoori ŋↄn n-nyɛ seem maa." 15Tↄ; ka bana, ni Izraɛli dima maa zaa, daa kur guusiri Naawunni ŋↄn ya n-tum sↄ na n-ti ba, ni u ti su ba naam fukumsi la. Ba daa puri lala naaba yuuri, ni, 'Masiiya', bee 'Kirisita'. Dinŋↄna Gyↄni ŋↄn daa tↄ'asi u yɛttↄ'a seem maa, ba daa birisiri ni m-boosiri taaba, ni, "Ammi, Masiiya na'a nŋↄ, bee?" 16Amaa Gyↄni daa tasi n-yɛli ba zaa, ni, "Koom ka mani zaŋŋi n-suuri ya wa, amaa sↄ kyɛnni na ŋↄn nin zaŋŋi Sii Kasi ni bugum n-suuri ya. Ŋↄna n kpeem n-gaari ma halli ka mani bu sum ni m pirigi u namna n-ti u. 17U kyɛnni na, ka pun maali u neema siri ni u pii u kabuubu tampii maa n-niŋi ka kasikasi. U nin yeeli u kyi maa n-yiisi wuurigu la ka kyɛ kabeelim. Kasuma maa ka u nin la'asi n-su u kusↄkku maa ni, ka naayi zaŋŋi wuurigu maa zaa n-vaai m-basi bugunseebu bun ka kpiisigu puuni." 18Tↄ; ka Gyↄni daa kpamsiri niriba lala, ka paasiri ba yɛligu pam zaŋŋi n-kyaŋŋi Naawunni lahabasuŋŋu maa ni. 19Tↄ; ka NaaHɛroodi daa pun fa u maŋtoori beeri pↄ'a la - pↄ'a maa mun yuuri daa boonni Hɛroodiyasi - ka anŋↄ zaa nyaaŋŋa ka Gyↄni daa galim Naaba maa dizugu, ni, Naaba galimiya pam, m-paasi ŋↄn daa pun tum tumbɛseesi la zugu. 20Dinzugu NaaHɛroodi daa laa n-tum tumbɛseaa kan gaari ŋↄn pun tum tunseesi la zaa ka kyɛ ka ba gbaai Gyↄni n-kpari dansarika ni. 21Tↄ; amaa ban daa na bu gbaai Gyↄni sahanseaa la, ka ŋↄn daa na suuri daadam zaa Naawunni koom maa, ka Yisa gba daa su. Ban daa su Yisa koom n-naai ka u daa puusiri Naawunni la, di saha ka saazugu sangbana daa yoaai 22ka Naawunni Sii Kasi daa yi na n-sigi u saanni na: Sii maa mun daa ŋmani la hoo naŋmanni. Ka ba daa wum Naawunni kukↄri saazugu na ka yɛnni, ni, "M bii n nyɛ i, ka n wuri i pam; n nini n tigi i." 23Tↄ; ka dinŋↄna Yisa mammaŋŋa ŋↄn daa ti ya piili u tuma maa, u yuuma n daa nyɛ kaman yuuma pisita. Niriba daa teesi, ni, u nyɛ la Gyoosɛfi biiya. Gyoosɛfi mun daa nyɛ la Heeli biiya, 24Heeli Mattaati biiya, Mattaati Liivai biiya, Liivai Mɛlikyii biiya, Mɛlikyii Gyannai biiya, Gyannai Gyoosɛfi sↄ biiya, 25Gyoosɛfi Matatayasi biiya, Matatayasi Eemↄsi biiya, Eemↄsi Neehum biiya, Neehum Ԑsili biiya, Ԑsili Nagyeaai biiya, 26Nagyeaai Maati biiya, Maati Matatayasi sↄ biiya, Matatayasi Sɛmeeyini biiya, Sɛmeeyini Gyoosɛkyi biiya, Gyoosɛkyi Gyooda biiya, 27Gyooda Gyↄ'anan biiya, Gyↄ'anan Reesa biiya, Reesa Zɛrubabɛli biiya, Zɛrubabɛli Seaalitiyɛli biiya, Seaalitiyɛli Neeri biiya, 28Neeri Mɛlikyii biiya, Mɛlikyii Addi biiya, Addi Koosaam biiya, Koosaam Ԑlimadam biiya, Ԑlimadam Yeeri biiya, 29Yeeri Gyↄsuuwa sↄ biiya, Gyↄsuuwa Ԑliyeeziri biiya, Ԑliyeeziri Gyoorim biiya, Gyoorim Mattaati biiya, Mattaati Liivai biiya, 30Liivai Simiyↄn biiya, Simiyↄn Gyuuda biiya, Gyuuda Yisifu biiya, Yisifu Gyoonan biiya, Gyoonan Ilayakyiim biiya, 31Ilayakyiim Miliiya biiya, Miliiya Mɛnna biiya, Mɛnna Matata biiya, Matata Neetan biiya, Neetan NaaDauda biiya, 32NaaDauda Gyɛsi biiya, Gyɛsi Oobɛdi biiya, Oobɛdi Bↄ'azi biiya, Bↄ'azi Seaala biiya, Seaala Neeseoon biiya, 33Neeseoon Aminadaba biiya, Aminadaba Arimin biiya, Arimin Aani biiya, Aani Hɛzrↄn biiya, Hɛzrↄn Pɛrɛzi biiya, Pɛrɛzi Gyuuda biiya, 34Gyuuda Yaakubu biiya, Yaakubu Yisahaaku biiya, Yisahaaku Ibrahim biiya, Ibrahim Teera biiya, Teera Neehoori biiya, 35Neehoori Sɛrugu biiya, Sɛrugu Reoo biiya, Reoo Pɛligi biiya, Pɛligi Hibri biiya, Hibri Seela biiya, 36Seela Kyeenan biiya, Kyeenan Aafaksaddi biiya, Aafaksaddi Seemi biiya, Seemi Nuhu biiya, Nuhu Lamɛkyi biiya, 37Lamɛkyi Mɛtusala biiya, Mɛtusala Inↄkyi biiya, Inↄkyi Gyɛreedi biiya, Gyɛreedi Mahalaleelli biiya, Mahalaleelli Kyeenan biiya, 38Kyeenan Inↄsi biiya, Inↄsi Sɛtti biiya, Sɛtti Adam biiya; ŋↄn Adam muna, Naawunni bii n daa nyɛ u.
Read More