Read God's Word: the Bible

  • What does this tell you about God?
  • What does this tell you about Jesus?
  • What does this tell you about people?
  • If this is true, what difference would it make in your life?
  • Who are five people who you can share your discoveries with?

Luke 18:1-43

1Tↄ; ka Yisa daa tↄ'asi ba yɛttↄ'anyɛsiri din wulisiri, ni, di sumni niriba susiri Naawunni saha kam, ka ba di gyɛ ka kyɛ susigu. 2U daa yɛli ba, ni, "Sarikattisↄ daa bɛ tinseaa. U daa bu zↄri Naawunni ka mun bu laa n-kyɛ ka u ba'a bɛ ninsaalisↄ kam yɛlli ni. 3Tↄ, ka pukↄsↄ daa bɛ lala tiŋŋa maa ni, ka u kur zɛya n-kyɛnni doo maa saani na, ni, u tↄ'asim u yɛttↄ'a maa n-fa u u dindaana nuu ni. 4Ka sarikatta maa daa yuui beela ka bu sakki ni u fa u m-basi. Ka di daa niŋi lala ka u daa yɛli u sufu ni, ni, 'Halli ni m bu zↄri Naawunni ka m ba'a ka ninsaala yɛla ni la zaa yↄri, 5amaa pukoori wa ŋↄn kur mugsiri ma maa zugu, n nin kari u sariya ka fa u m-basi, ka di yi pa lala u sahakam kyɛnni na wa nin ti ŋmɛ n nyↄya.' " 6Ka ti Dugma daa laa n-yɛli, "Ya wumma sarikatta tumbeeri daana ŋↄn yɛli seem la. 7Kala, ya teesiya, ni, Naawunni ku ti wum ninvugseeba ban kumni m-paari u wuntaŋŋa ni yuŋŋu, ni, u suŋŋma ba maa ka zↄ ba namboo, ka fa ba m-basi? 8N ya yɛli ya, ni, u nin fa ba m-basi yoomyooma. Ka di zaa yↄri, man Ninsaala Bii yi ti labi duniya wa ni na, n nin nya ban mari yɛdda bɛni, bee? - Ay, m bu ya nya!" 9Tↄ. Yisa daa tↄ'asi yɛttↄ'anyɛsiri n-ti ninvugseeba ban gↄsi ba mansi, ni, ninvugsuma, ka mun gↄsiri ba taaba n-zeemni ba. Ka nyɛsiri daa bɛ ni, ni, 10"Niriba ayi n daa bɛ ni, n-kyaŋŋi Naawunni Gyeeŋŋu Yiri ni ba ti gyeem Naawunni; ba yinni mun daa nyɛ la Farisii, ka ŋↄnla mun daa nyɛ lampodeaara. 11Ka Farisii maa ŋↄn daa zɛ saazugu m-puusi u wumpuusigu n-ti u maŋŋa, ni, 'Naawunni, m pɛ'ari i pam man pa la hoo niriba zaa m bɛ seem maa, dama ba zuura ka tumni taalli, ka faari taaba pↄ'aba - halli m pa la hoo lampodeaara wa ŋↄn bɛ seem. 12Dama n loori noori dabsa ayi bɛkwai kam, ka yiisiri man nyari bunseelli kam zaa zakka.' 13Amaa ka lampodeaara ŋↄn daa zɛ u kↄkↄ kpaŋŋa sa. Vi ŋↄn daa gbaai u zugu u daa zↄri dabeem ka bu wukki u zugu n-gↄsi saazugu, ka daa kur mari u nuusi m-buuri u maŋŋa sufusa'aŋŋu zugu, ka yɛtta, 'M Ba Naawunni, zↄm man tumbeeri daana wa namboo!' " 14Ka Yisa daa ŋmaligi n-yɛli ba, "N ya yɛli ya ni, ni, di daa nyɛ la lampodeaara maa ŋↄn daa yi n-kuli ka yi taalli ni, pa ŋↄnla. Dinzugu ŋↄnkam tibgri u maŋŋa nin fiilim, ka ŋↄnkam mun sigsi u maŋŋa nin nya tibsim." 15Ba daa mari bileesi n-kyɛ Yisa saani na ni u zaŋŋi u nuusi n-siisi ba, ka u nyaandↄliba maa daa nya ban niŋni seem ka daa nyikki ba di zugu. 16Yisa mun daa booli bibisi na ka yɛli u nyaandↄliba maa, ni, "Ya kyɛ ka bibisi maa kyɛ n saani na, yan di ta'ari ba! Dama banŋↄ taabu n su Naawunni naam la yɛla. 17Yɛlimaŋni ka n yɛli ya wa, sↄ yi bu sakki Naawunni naam yɛligu maa hoo bibila ŋↄn sakkri seem la, u ku toaai n-kpɛ Naawunni naam maasim maa ni." 18Tↄ; ka toondaansↄ daa boosi u, ni, "N Karimbasuŋŋu! N ya niŋi la wula n-nya nyↄvuri kan ka naari?" 19Ka Yisa labsi m-boosi u, ni, "Wula ka i booli ma, ni, bunsuŋŋu? Sↄ n ka ni n-nyɛ bunsuŋŋu, na'ala Naawunni kↄkↄa. 20Tↄ; i mi zaaligu yɛla maa an nyɛ seem: ni, 'Di tum zina.'; ni, 'Di ku ninsaala.'; ni, 'Di zu.'; ni, 'Di di ziri sɛhara n-lusi i kpeaa u yɛlli ni.'; ni, 'Tim i ba ni i ma gyirima.' " 21Ka doo maa daa yɛli, "Anŋↄ zaa ka n daa pun dↄli ka na nyɛ na'akyimbila." 22Ka Yisa wum lala ka yɛli u, "Yɛlli yinni n kpalim m-pↄsigi i; see ka i koosi i marigu zaa n-zaŋŋi n-tↄri faradima, ka i arizikki maali n-zoaai Naawunni saani. Ka kyɛ na n-dↄli ma." 23Tↄ, ka doo maa ŋↄn daa ti wum lala u sufu daa sa'am pam, dama u daa nyɛ la bundaana ni pam. 24Ka Yisa daa gↄsi u ka yɛli, "Yɛlimaŋni, di nin tↄ pam ni bundaana kpɛ Naawunni naam ni! 25Halli arakoomi nin ti kpɛ kparipiim voori ni m-puli n-yi, ka bundaana ku toaai m-ma'asi ni u kpɛ Naawunni naam ni." 26Ka ban daa wum ŋↄn yɛli seem maa daa boosi u, ni, "Ka ŋↄni n nin tuligi?" 27Ka u yɛli ba, "Yɛttↄ'aseesi an tↄ pam ninsaalidima saani maa pa la an tↄ Naawunni saani." 28Di saha ka Piita daa yɛli Yisa, ni, "Nyama, tirima kyɛ ti bunseelli kam ka dↄli i maa!" 29Ka u yɛli ba, "Yɛlimaŋni ka n ya yɛli ya, ŋↄnkam kyɛ u yiri, bee u pↄ'a, bee u babiisi ni u mabiisi, bee u ba ni u ma - halli u maŋtoori biisi gba - Naawunni naam maa zugu, 30di daama nin ti nya laara n-gaari anŋↄ zaasa pampaŋŋↄ; ka saha din kyɛnni na u nin ti nya nyↄvuri kan ka naari." 31Ka u daa laa n-zaŋŋi u nyaandↄliba pii ni ayi maa n-yi kpaŋŋa nti yɛli ba, "Ya wumma, ti wa la Gyɛrusalɛm; ka anabidima ŋↄn daa sↄbi seelikam zaŋŋi n-kyaŋŋi man Ninsaala Bii yɛla la nin ti paai a naari. 32Ba nin zaŋŋi ma n-niŋi ban pa ti butiri niriba la nuu ni, ni ba maali ansarisi n-zeem ma, 33ka tusi nantoori n-niŋi ma, ka naayi feebi ma ka ku ma. Amaa daba ata daari n nin yisigi kum ni." 34Amaa ba daa bu baŋŋi ŋↄn daa yɛli ba yɛttↄ'aseesi maa zaasa gbinni; di daa nyɛ la yɛttↄ'asↄ'ara ba saani, ka ba daa bu baŋŋi di gbinni. 35Yisa ŋↄn daa kyɛnni n-ti paai Gyɛrikoo tiŋŋa, zoonsↄ zi soori gbiriŋŋu m-maanni bara; 36ka ti wum daadam ŋↄn daa gatti la damni ka boosi ni u baŋŋi din niŋna. 37Ka ba yɛli u, ni, di nyɛ la Yisa, Nazarɛti doo la, n-gatti maa. 38Amaa u daa n-tasi pampam n-yɛli, "NaaDauda biiya, zↄm ma namboo!" 39Ka ban daa bɛ tooni maa daa nyikki u n-yɛli, ni, u fooma u vuuri. Amaa u daa laa n-tasi pampam, ni, "NaaDauda biiya, zↄm ma namboo!" 40Ka Yisa kpalim n-zaani ka yɛli, ni, ba zaŋŋma u na. Ka ŋↄn daa ti pↄri ba saani na, Yisa boosi u, ni, 41"Bↄ ka i boora ni n niŋi n-ti i?" Ni, "M Bapira, m boori n laa n-nyari yaasa." 42Ka Yisa daa labsi n-yɛli u, "Neaama ka nyari yaasa! I yɛdda maa kyɛ ka i nini neaaya." 43Ka u nini maa daa neaai ya'abi ka u gyeemni Naawunni ka dↄli Yisa ka ba kyɛnna. Ka zama maa zaa daa nya din niŋi maa ka daa pɛ'ari Naawunni.
Read More