Read God's Word: the Bible

  • What does this tell you about God?
  • What does this tell you about Jesus?
  • What does this tell you about people?
  • If this is true, what difference would it make in your life?
  • Who are five people who you can share your discoveries with?

Luke 17:1-37

1Ka Yisa daa yɛli u nyaandↄliba maa, ni, "Di ku toaai n-niŋi ka yɛttↄ'abeeri bu paari ya na, yɛttↄ'aseesi an lusiri niriba n-kpeesiri tumbeeri ni. Amaa ninvugsↄ ŋↄn taasi a na muna - waay, waay, waay! 2Ba yi da zaŋŋi neeri n-lↄ di daama nangoori ni ka zaŋŋi u n-lↄsi mↄ'azuliŋŋu ni, di da sↄ u zugu n-gaari u kyɛ ka bibisi wa yinni lu n-kpɛ tumbeeri ni." 3Ni, "Ya gbaam ya mansi suŋŋa! I mabiiya yi tum i taalli, nyin sɛ'asim u; ka u yi deaai u galinsi maa, nyin kyɛri u taalli m-pɛŋŋi u. 4Halli u yi ti tum i taalli napↄmbuyↄpↄi dahinyinni ka ŋmaligi buyↄpↄi n-yɛli i, ni, 'N galimiya.' nyin kyɛri u taalli m-pɛŋŋi u." 5Tↄ, ka tuumudima maa daa yɛli ba dugma, ni, "Paasim ti yɛdda!" 6Ka u daa labsi n-yɛli ba, "Ya yi mari yɛdda ka di sa'ai hoo zinzam beelli, ya nin toaai n-yɛli kinkaŋŋa wa, ni, ka voaama ka zaazii wa ni n-kyaŋŋi nti sa mↄ'ari puuni, ka di nin niŋi lala." 7Ka Yisa daa boosi ba, ni, "Ya puuni ŋↄni n lee m-mari u daabri ka u koora, bee, ka u guri la bunkↄbri, ka u ti yi moo na ka u di yɛli u, 'Kyɛm na nti zinni n-di bundirigu.' 8Kala, i ku yɛli u, ni, u kyɛm na n-dugi bundirigu na nti zaali ka i di ka nyu pↄi, ka u mun naayi kyaŋŋi nti maali u siri n-zinni n-di ka nyu? 9Ka daabri maa ŋↄn tum lala maa, i nin puusi u dizugu? Ay! ban zaali u tunseesi maa nla. 10Dizugu lala n nyɛ di :- ya gba yi niŋi ban zaali ya ni ya niŋi seem maa zaa, ya yɛlima, ni, 'Ti bu sumni pɛ'abu, dama ti tum la ti tuma ŋↄn nyɛ seelli kↄkↄa.' " 11Tↄ: ka Yisa ŋↄn daa ti yi soori zugu n-wa Gyɛrusalɛm, u daa dↄli Samɛrii ni Galilii tingbana sunsukkuni n-gatta. 12N-kpeeri tinkpanseaa ni, ka kↄnsi piiya daa ti kyirigi u. 13Ba daa zɛ la wa'aligu sa ka tasi pampam n-yɛli u, "Ti Ba Yisa, zↄm ti namboo!" 14Ka Yisa ŋↄn daa nya ba lala maa, u daa yɛli ba, "Ya kyɛma nti zaŋŋi ya mansi n-wulisi maalimaanniba." Ban daa ŋmaligi n-kyɛnni maa, ba daa nya alaafɛ zaa. 15Ka ba ninvugyinni ŋↄn daa ti nya ka u kpaŋŋi maa n-naai, 16u daa ŋmaligi n-labi Yisa saani na, ka kur kaasiri pampam m-pɛ'ari Naawunni, 17halli nti sↄmni Yisa tooni m-puusiri u. Doo maa mun daa nyɛ la Samɛrii nira. Di saha ka Yisa boosi u, ni, "Pa ya niriba piiya n da kpaŋŋi maa? 18Ka niriba awai la kpalim m-bɛ la yani? Bee sↄsↄ bu labi na ni u ti pɛ'ai Naawunni na'ala tinzuŋŋu nira wa kↄkↄa?" 19Ka ŋmaligi n-yɛli u, "Doaama! Ka i yɛdda niŋbu zugu ka i kpaŋŋi." 20Farisiseeba daa ti boosi Yisa, ni, "Bↄ saha ka Naawunni naam maa ti ya m-piili?" Ka u gyɛrigi n-yɛli ba, "Naawunni naam piiligu pa la niriba ŋↄn gↄsiri n-nyari bunseelli. 21Bee, sↄ di yɛli, 'Nyama, di bɛ kpa wa!', bee, 'Di bɛ kpa sa!' Dama Naawunni naam pun bɛ la ya saani." 22Ka Yisa daa yɛli u nyaandↄliba maa, ni, "Saha kyɛnni na ka ya nin ti boori ni ya nya man Ninsaala Bii saha wa dabsiri yinni gba, ka ku nya ka. 23Niriba nin ti yɛli ya, ni, 'Nnya kpa sa!', bee, 'Nnya kpa wa!' - yan di kyaŋŋi, ya mun di dↄli ba. 24Dama Ninsaala Bii dabsiri maa yi ti paai, u nin ŋmani hoo saa ŋↄn yi nya'asiri la, n-neaai sangbana gbinni n-yi ya'ari wa zaŋŋi n-kyaŋŋi ya'ari wa sa. 25Amaa faasee ka u daŋŋi n-di wahala pam pↄi, ka zuna niriba ti za'asi u yɛla ka zeem u. 26Ka din daa kur niŋi seem Nuhu saha la, lala ka di ti ya niŋi Ninsaala Bii gba dabsiri maa daari. 27Niriba daa diri ni ka nyuura di dabsiri maa, ka diri pↄ'aba ka zaŋŋni ba bipunsi n-tiri dↄppa, halli nti paai Nuhu ŋↄn daa ti kpɛ nyarintitaari maa ni dahinseaa maa. Di nyaaŋŋa ka koom daa kyɛ na nti di ba zaa. 28Lↄti saha la gba daa nyɛ la lala. Ba daa kur diri ni ka nyuura, ka daara, ka koosira, ka butti bumbura, ka meeri yiya; 29halli nti paai Lↄti ŋↄn daa yi Sↄdoom tiŋŋa na dahinseaa maa, ka bugum daa yi saazugu na, ni farinwuta bugum, n-laŋŋi n-di ba zaa. 30Lala ka di nin ti niŋi Ninsaala Bii gba dabsiri maa yi ti yi paalu. 31Dindaari maa ka ninvugsↄ ŋↄn ti bɛ piiya duu zugu ka u neema kpalim m-bɛ duu puuni, u di yɛli, ni, u sigi na n-kpɛ n-zaŋŋi a. Ka ŋↄn mun bɛ puu ni, ŋↄn di labi u nyaaŋŋa n-kuli. 32Ya teaama din daa niŋi Lↄti pↄ'a seem la. 33Ŋↄnkam boori ni u tuligi u nyↄvuri nin ti sa'am ka m-basi, ka ŋↄnkam sakki ni u nyↄvuri sa'amna, ŋↄn mun nin ti nya nyↄvuri ni yɛlimaŋni. 34N yɛtti ya wa, ni, di daari maa ka niriba ayi nin ti la'am n-dↄ bundoaa yinni zugu yuŋŋu, ka Naawunni nin ti kpikki ninvugyinni ka kyɛ ŋↄnla. 35Ka pↄ'aba ayi nin ti la'am n-neemni ba kyi neeri zugu, ka Naawunni kpikki yinni ka kyɛ ŋↄnla." 37Ka u nyaandↄliba maa boosi u, "Ti dugma, yani zii nla?" Ka u yɛli ba "Bunkpiiŋŋu ŋↄn bɛ luginseaa, bɛni ka zuusi la'amni taaba m-bɛ ni."
Read More