Read God's Word: the Bible

  • What does this tell you about God?
  • What does this tell you about Jesus?
  • What does this tell you about people?
  • If this is true, what difference would it make in your life?
  • Who are five people who you can share your discoveries with?

Luke 16:1-31

1Tↄ; ka Yisa daa laa n-yɛli u nyaandↄliba maa, ni, "Bundaansↄ n daa bɛ ni, m-mari u tuntunsↄ ŋↄn daa su u arizikki tuma fukumsi zaa. Ka ba daa kyɛ bundaana wa saani na nti wulisi u, ni, u tuntumna maa diri la u ligri maa yↄriyↄri. 2Dizugu ka bundaana maa daa booli u na n-yɛli u, 'Ka bↄ yɛttↄ'a ka n wumni zaŋŋi n-kyaŋŋi i saani wa? Kyɛma nti sↄbi laasaabu gbaŋŋu zaŋŋi n-kyaŋŋi n yɛliseesi an bɛ i nuu ni la zaa, ka mari na n-ti ma; ka i ku laa n-su n tuma maa fukumsi yaasa!' 3Ka doo maa daa yɛli u sufu ni, ni, 'N yi ya niŋi la wula, n daana ŋↄn ya yiisi ma u tuma maa ni wa? N ka yaa di nin toaai n-kↄa; di mun laa m-mari ma vi ni m maanni bara.', ni, 4'Tↄ! M baŋŋiya man nin niŋi seem din nin kyɛ ka niriba nin deaai ma ba yiya ni, ba yi ti kari ma n kpa wa tuma wa ni m-basi sahanseaa la!' 5Ka dizugu u daa la'asi la ninvugseeba ban di u daana sama maa zaa, yinniyinni: ka daŋŋi m-boosi tooni daana maa, ni, u daana samni ala m bɛ u saani? 6- ka u daa labsi n-yɛli, ni, kpaŋmana kↄbga; ka u daa yɛli u, 'Tↄ, deaam i samni gbaŋŋu ya'abi n-takki n-sↄbi, ni, kpaŋmana pisinu!' 7Ka daa laa m-boosi ŋↄn pa tooni daana maa zugu gba, ni, u daana samni ala m bɛ u saani? ka u labsi n-yɛli, ni, kabootu kↄbga; ka u daa yɛli u, 'Deaam i samni gbaŋŋu ya'abi n-takki n-sↄbi, ni, bootu pisinii!' 8Ka u daana ŋↄn daa baŋŋi tumbeeri daana wa ŋↄn niŋi seem wa, u daa yɛli, 'Wooy! U mari la yɛm pam!' Dama duniya wa ninvugbeeri mari la yɛm zaŋŋi n-kyaŋŋi ba duniya wa yɛla n-gaari ban dↄli neesim soori maa ŋↄn mari seem." 9Ni, "N ya yɛli ya ni, ni, duniya wa ligri nyɛ la bunyↄya: ya zaŋŋma a m-bↄ niriba zoori, ka lala nin kyɛ ka a yi ti gaari ka kyɛ ya sahanseaa maa, ya zↄdima nin zaŋŋi ya n-niŋi ba yiri maasim ni, saha din ka tↄriga. 10Dama ba yi kyɛ ka ninvugsↄ su yɛttↄ'abisi fukumsi ka u zɛ yimmu, ba yi ti kyɛ ka u su yɛttↄ'akara gba u nin zɛ yummu. Amaa ninvugsↄ ŋↄn su yɛttↄ'abisi ka ka yɛdda a puuni, ŋↄn nin laa n-kↄŋŋi yɛdda yɛttↄ'akara gba puuni. 11Dizugu ya yi bu zɛ yimmu zaŋŋi n-kyaŋŋi duniya wa la'ayↄya yɛla, ŋↄni nin lee nin sakki n-zaŋŋi arizikki maŋni n-niŋi ya nuu ni. 12Bee ba yi zaŋŋi sↄ bunni n-niŋi ya nuu ni ka ya bu zɛ yimmu, ŋↄni n lee nin zaŋŋi ya mammaŋŋa dinni n-ti ya? 13Ninvugyinni ku toaai n-leebi dugmadima ayi daabri: see ka u za'asi yinni yɛla ka wuri yinni la, bee u tibgi yinni la, ka zeem ŋↄnla. Ya ku toaai n-kyɛ ka Naawunni su ya yɛla ka laa n-kyɛ ka ligri gba su ya." 14Tↄ; ka Farisii dima daa nyɛ ban wuri ligri pam: ba daa wum Yisa ŋↄn daa yɛli seem maa ka ba daa maanni u ansarisi. 15Ka u yɛli ba, "Yarima n nyɛ ban boori ni ninsaala nya ya yɛla n-yɛli, ni yɛlimaŋni niriba n nyɛ ya; amaa Naawunni ŋↄn mi din bɛ ya sufu puuni. Ninsaalidima ŋↄn tibgri bunseelli pam la nyɛ la Naawunni ŋↄn kyisiri seelli." 16Ni, "Musa zaaligudima ni anabidima sↄppu yɛla n daa pun bɛ ni, halli ka Gyↄni ti kyɛ na; amaa di saha zaŋŋi n-kyɛnna ba na kur moonni Naawunni naam lahabasuŋŋu ka sↄkam zaa zaŋŋi kpeeŋŋu m-moori ni u kpɛ di maasim ni." 17Ni, "Musa zaaligu muna - arizana ni duniya zaa yi ti gaari m-basi, di bu tↄa; amaa zaaligu bumbila fiiŋ gba basibu tↄ ni halli nti yakki." 18Ni, "Ŋↄnkam kari u pↄ'a ka laa n-di pↄ'asↄ tumni la zina, ka dↄsↄ ŋↄn di lala pↄ'a maa gba tumni la zina." 19Ka Yisa daa laa n-yɛli, "Bundaansↄ n daa bɛ ni, n-yeeri kparikara ni bunyeerisuma zaa, ka diri u sufu yuubu bundira dabsiri kam zaa. 20Ka faradaansↄ mun gba daa bɛ ni, ka u ningbina zaa daa niŋi nↄra: doo wa yuuri daa boonni la Lazarusi. Ka beoo kam ka ŋↄn Lazarusi daa yi kyɛnni bundaana wa yiri za'anↄri ni na n-dↄ bɛni. 21U daa yi dↄya m-boori la bundaana maa bundirikyɛba ti lu tiŋŋa ka u piisi n-di, ka baasi kur kyɛnni na n-leenni u nↄra maa. 22Tↄ, di daa niŋi lala, ka faradaana maa daa ti kpi, ka malaakadima zaŋŋi u n-taasi ti yaaba Ibrahim saani. Ka bundaana maa gba daa ti kpi, ka ba sↄ'ai u. 23Ka ŋↄn mun daa kyaŋŋi nti bɛ kpiimma ŋↄn bɛ seela n-nyari wahala la, ka daa wukki u zugu n-gↄsi saazugu n-nya ti yaaba Ibrahim wa'aligu sa, ka Lazarusi bɛ u saani. 24Ka bundaana maa daa tasi n-yɛli, 'Ti Yaaba Ibrahim, zↄm ma namboo, ka tum Lazarusi ka u zaŋŋi u nubila n-tum koom ni n-tↄkki n-niŋi n zilimni wa ni na, ka ka maai; ka n diri wahala pam bugum wa puuni.' 25Ka Ibrahim yɛli u, 'M biiya, teaam nyin daa bɛ i nyↄvuri sahanseaa la yɛla, ni, i daa nyari i sufu yuubu, sahanseaa ka Lazarusi mun daa nyari wahala. Amaa pampaŋŋↄ ŋↄn sufu maaya, ka nyin mun gba yi bɛ wahala ni. 26Din paasi dinŋↄ zugu, bↄ'atitaari n dↄya tirim ni yarima sunsukkuni, ka sↄ ku toaai n-yi ti saani n-yakki ka m-paai ya saani sa, ka sↄ mun gba ku toaai n-yi bɛni n-kyɛ ti saani na.' 27Di saha ka bundaana maa daa yɛli, 'M Ba! N susiri i ni, ni, i tum Lazarusi ni u kyaŋŋi m ba yiri ni, 28dama m mabiisi anu na bɛ ni, ka u kyaŋŋi nti sɛ'asi ba ni ba di kyɛ na n-kpɛ man ŋↄn bɛ wahala seaa wa ni.' 29Ka Ibrahim daa labsi n-yɛli u, ni, 'Musa sↄppu, ni anabidima dinni, bɛ la ba saani, dizugu ba wumma ba yɛligu ka sɛ'asi ba mammansi.' 30Ka bundaana maa laa n-yɛli, 'N Yaaba Ibrahim, pa lala. Amaa sↄ mun yi da neaai kum ni n-kyaŋŋi ba saani nti yɛli ba, ba da naa n-takki ba beesigu n-niŋi tuuba.' 31Ka u yɛli u, 'Ba yi ku niŋi Musa ni anabidima yɛligu yɛdda, halli sↄ yi neaai kum ni n-kyaŋŋi nti yɛli ba, ba ku niŋi u gba yɛligu maa yɛdda.' "
Read More