Read God's Word: the Bible

  • What does this tell you about God?
  • What does this tell you about Jesus?
  • What does this tell you about people?
  • If this is true, what difference would it make in your life?
  • Who are five people who you can share your discoveries with?

Luke 24:1-53

1Ka bɛkwai maa piiligu dabsiri, Alahari daari maa, pↄ'aba maa daa doaai asuba pinipini, ka zaŋŋi turaaliseebu ban pun da n-zaali la m-mari n-kyaŋŋi gballi maa ziiya. 2Ban daa paai bɛni maa, ba daa nya ka kugseaa ban daa zaŋŋi n-ligi gballi maa noori la daa pun bilim n-yi kpaŋŋa ka kyɛ ka. 3Ka ban daa kpɛ gballi duu maa puuni, ba daa bu nya ti Dugma Yisa ningbiŋŋu maa. 4Ka di daa gyɛri ba pam. Di saha ka dↄppa ayi di yi na n-zaani n-tabli ba, ka ba sutura nya'ari nyain. 5Ka dabeem daa gbaai pↄ'aba maa pam, ka ba sunni ba zugri tiŋŋa. Ka dↄppa maa daa boosi ba, ni, "Wula ka ya boori nyↄvuri daana kpiimma ziiya? 6U laa n-ka kpa, u yisigiya. Ya teaam ŋↄn daa yɛli ya seem, ŋↄn daa na bɛ Galilii tingbaŋŋu sahanseaa la. 7U daa yɛli ya, ni, di kpa la talasi ni ba zaŋŋi Ninsaala Bii maa n-niŋi ala'akyi dima nuusi ni, ka ba kpaasi u n-tabli dↄpulli zugu, amaa ka u nin ti neaai kum ni daba ata daari." 8Di saha ka pↄ'aba maa daa siri teaai Yisa ŋↄn daa pun yɛli ba seem maa, 9ka daa labi n-kuli yiri ni, ni ba ti yɛli Yisa nyaandↄliba pii ni yinni maa, ni ba taaba zaa. 10Mariama, Magdala tiŋŋa pↄ'a la, n-daa la, ni Gyeoowana, ni Mariama Gyeemsi ma la, ni pↄ'aseeba m-paasi ba zugu. Ka ba daa kyaŋŋi nti mooli yɛla wa zaa lahabaari n-ti Yisa tuumudima maa. 11Amaa ba yɛttↄ'a maa daa ŋmanni la yɛttↄ'ayↄya n-ti ba, ka ba daa bu niŋi ba yɛdda. 12Amaa Piita mun daa doaai n-zↄ n-kyaŋŋi nti paai gballi maa ni, n-sunni n-gↄsi ka puuni n-nya tampeela maa kↄkↄ ŋↄn dↄya. Ka u daa labi n-kuli, ka di niŋi u alahazibu din niŋi maa zugu. 13Tↄ. Di daari maa ka ba niriba ayi daa kyaŋŋi tinkpanseaa. Tiŋŋa maa yuuri daa boonni la Imeeyusi: ka nyɛ la maala ayↄpↄi zaŋŋi m-paai Gyɛrusalɛm. 14Ka ban daa bɛ soori maa, ba daa diri azama n-tↄ'asiri taaba zaŋŋi n-kyaŋŋi bunseesi an daa niŋi maa yɛla. 15Ka ban daa kyɛnni n-sↄsiri sahanseaa maa, Yisa paai ba saani na. U daa paasi ba zugu ka ba bata zaa la'am n-kyɛnna. 16Amaa ba daa bu nyaŋŋi m-baŋŋi u. 17Ka u boosi ba, ni, "Azambↄ ka ya diri ni taaba ya soori wa ni?" Ka ba kpalim n-zaani, ka ba sufu na kur sa'am ni. 18Ka ba yinni, ŋↄn yuuri boonni Kliyↄpaasi la, daa gyɛrigi n-yɛli u, ni, "Saanseeba zaa ban bɛ Gyɛrusalɛm puuni maa m mi din niŋi daba ayi wa puuni, di yi pa la nyin kↄkↄ, fa?" 19Ka u boosi ba, ni, "Bumbↄ yɛla?" Ka ba labsi n-yɛli u, "Yisa ŋↄn daa nyɛ Nazarɛti nira la yɛla ka ti tↄ'asira. Anabi n daa nyɛ u, ka u daa tum tunkara ka tↄ'asi yɛttↄ'aseesi an daa wulisi u yaa ŋↄn bɛ seem maa, Naawunni saani ni niriba gba saani. 20Ni, ti gyeeŋŋu toondaandima ni ti kpamma maa zaŋŋi u n-tisi ka ba kari u sariya ka kpaasi u n-tabli dↄpulli zugu n-ku u. 21Amaa tirim daa mari la tama, ni, ŋↄna n ya fa Izraɛli dima m-basi. Ka din paasi dinŋↄ zugu, zuna nyɛ la daba ata daari yɛla wa ŋↄn niŋi maa. 22Yaasa, pↄ'aseeba ban bɛ ti saani n kur kyɛ ka di gyɛri ti, dama ba da daŋŋi n-kyaŋŋi gballi maa ni zuna asuba wa, ka bu nya u ningbiŋŋu maa; 23ka labi na n-yɛli ti, ni, ba nya malaakadima ka ba yɛli ba, ni, u neaaya. 24Ka ti ninvugseeba gba doaai n-kyaŋŋi gballi maa ni, ni ba nya; ka di nyɛ la hoo pↄ'aba maa ŋↄn da kur yɛli seem. Amaa ba gba da bu nya Yisa." 25Ka ŋↄna n daa yɛli ba, ni, "Yarima yamkↄŋŋniba wa! Ya bu wumni anabidima ŋↄn daa pun tↄ'asi yɛttↄ'aseesi la, ka bu sakki n-niŋi a yɛdda yooma! 26Ammi, di daa bu kpa talasi ni Masiiya maa nya lala namsigu maa pↄi ka naayi kpɛ u naam gyirima ziiya?" 27Di saha ka u daa gbaai u yɛttↄ'a m-piili n-wulisiri ba u mammaŋŋa yɛla Naawunni Litaafi ni. U daa piili la Musa sↄppu ni, halli nti paai anabidima ban daa dↄli u nyaaŋŋa. 28Tↄ, ka ba daa ti pↄri tinkpanseaa ban daa kyɛnni maa, u niŋi hoo ŋↄn yɛ n-gaari la tooni. 29Amaa ka ba goaai u n-yɛli, "Kpalimma ti saani, dama wuntaŋŋa luya ka yuŋŋu zibra." Ka u daa kpɛ, ni u ti gbɛ ba saani. 30Ka bundirigu saha ŋↄn daa ti paai maa, ba daa la'am taaba ni ba di, ka u daa zaŋŋi la diibu n-susi Naawunni n-niŋi ka, ka ŋmaasi n-ti ba. 31Di saha ka ba nini di neaai ka ba baŋŋi u, amaa ŋↄn mun lili ka kyɛ ba. 32Ka ba yɛli taaba, "Ti sufu da bu pɛligi ŋↄn da tↄ'asiri n-ti ti soori ni la? - ŋↄn da wulisi Litaafi maa gbinni la." 33Tↄ: ka ba yisigi di saha maa n-labi n-kyaŋŋi Gyɛrusalɛm. Ba daa paaya, ka nyaandↄliba piiya ni yinni maa, ni ninvugseeba ban daa bɛ ba saani la, la'am n-ziya. 34Ka ba yɛli ba, ni, "Ti Dugma siri neaaya ka Saimoon nya u!" 35Di saha maa ka Imeeyusi dima maa daa yɛli ba din niŋi ba soori ni. Ka laa n-yɛli ba ŋↄn ŋmaasi diibu n-ti ba ka ba baŋŋi u seem. 36Ka ban daa kur tↄ'asiri maa, Yisa mammaŋŋa di zaani ba sunsukkuni ka puusi ba. 37Amaa dabeem daa gbaai ba pam. Ba daa teesi, ni, ba nya la kpiinyisigi. 38Ka u boosi ba, ni, "Bↄ n niŋi ka di mugsi ya, ka ya birisiri ya teesa ni maa? 39Ya nyam n nuusi, ni n nↄba wa; mani nla! Ya siisim ma n-nya! Siiya ka numni ni kↄba hoo man mari seem wa." 40Ka ŋↄn daa yɛli nŋↄ n-naai la, u daa wulisi ba u nuusi ni u nↄba. 41Amaa ba sufu ŋↄn daa pɛligi seem maa zugu ba daa bu nyaŋŋi n-niŋi lala yɛdda, ka di daa gyɛri ba pam. Ka u boosi ba, ni, "Ya mari diseebu kpa?" 42Ka ba daa zaŋŋi zinseerigu beela n-ti u 43ka u deaai ka n-ŋↄbi ba tooni. 44Di saha maa ka u yɛli ba, "Yɛttↄ'a wa ka n daa pun tↄ'asi ya, man ŋↄn daa na bɛ ya saani sahanseaa la. N daa yɛli ya, ni, yɛttↄ'a pam pun sↄbi n-dooli zaŋŋi n-kyaŋŋi n yɛla Musa zaaligu maa ni, ni anabidima yɛla ni, halli Yuuma sↄppu maa ni gba. Di kpa la talasi ni anŋↄ zaasa ŋↄn wulisi seem la nin baasi n-niŋi." 45Ka u neaai ba yɛm ni ba ti baŋŋi Naawunni yɛligu maa gbinni, 46ka yɛli ba, "Di sↄbiya, ni, Naawunni ŋↄn ya n-tum Masisↄ na maa nin nya namsigu lala pↄi, ka naayi neaai kum ni daba ata daari. 47Ni, ba nin zaŋŋi Masiiya yuuri m-piili Gyɛrusalɛm timpuuni m-moonni lahabaari maa n-ti duniya wa zaa niriba, ni, ba ŋmaligma ka kyɛ ba tumbeeri tuma, ni ba ti nya ba taalli kyɛ-m-pɛŋŋi. 48Yarima n nyɛ ban nyɛ buna wa zaa sɛhara dima maa. 49Ya nyama, n nin tum sↄ na hoo m Ba Naawunni ŋↄn daa pun basi nangbambasiri n-ti ya seem maa. Yarima muna - ya kpalimma Gyɛrusalɛm halli ka ya ti deaai yiiko din yi saazugu ni na." 50U daa zaŋŋi ba n-yi halli nti paai Bɛtani; ka daa duusi u nuusi saazugu n-susi Naawunni alibarika yɛlisuma n-niŋi ba. 51Ka ŋↄn daa na kur susiri n-niŋni ba sahanseaa maa, u du n-kyaŋŋi saazugu ka kyɛ ba. 52Ka ba mun daa gyeem u ka ŋmaligi n-labi Gyɛrusalɛm ni sufupeelli pam. 53Ka kur bɛ Naawunni Gyeeŋŋu Yiri maa ni m-puusiri Naawunni.
Read More