Adventure

KU BUKOLE BUA NYUMA MUIMPE, MUENA KILISTO UDI MUA KUTSHIMUNA MVITA YA DITABUJA DITUKU DIONSO DIA MOYO WENDE.

Diba diwakuitabuja Yezu Kilisto, Nyuma Muimpe wakulua kusomba munda muebe. Nyuma Muimpe ngudi upesha muena Kilisto yonso diakalenga ne disanka mu moyo wende.

Bua Nyuma Muimpe Mukanda wa Nzambi udi wamba nunku:

1.   Nyuma Muimpe udi Nzambi (Bienzedi 5:3-5).

2.   Nyuma Muimpe udi munda mua muntu yonso udi muitabuje Yezu Kilisto bu      Musungidi wende (1 Kolinto 3:16; Lomo 8:9).

3.   Nyuma Muimpe udi utupesha bukole bua kuikala bena Kilisto (Galatia 5:22,23; Lomo 8).

4.       Nyuma Muimpe udi utupesha bukole bua kujaadikila bantu bakuabo Lumu Luimpe lua Yezu Kilisto (Bienzedi 1:8).

5.       Bukole bua Nyuma Muimpe mbupite bukole bua nyuma yonso mikuabo (1Yone 4:1-4).

Mukanda wa Nzambi udi utuleja mishindu ya bantu isatu:  

 


1.
MUNTU  UDI  KAYI  NE  KILISTO  MU  MOYO  WENDE  

Nyuma Muimpe kena usomba mu mutshima wa muntu udi kayi muanji Kuitabuja Kilisto bu Musungidi wende (Efeso 1:13). 

Mukanda wa Nzambi udi wamba ne: "Muntu udi kayi ne Nyuma wa Nzambi kena mua kuitabuja malu malelela adi afuma kudi Nyuma eu; malu aa adi bu bupale kudiye; kena mua kuajingulula nansha, bualu bua malu aa adi ajinguludibua anu kudi Nyuma" (1 Kolinto 2:14).

Tshindidimbi etshi tshidi tshituleja tshidi muntu udi kayi ne Kilisto mu moyo wende:

– Bulombodi bua moyo wa muntu nkayende.
– Yezu Kilisto

1.       Yezu udi pambelu pa moyo wende.

2.       Muntu eu udi ulombola moyo wende nkayende.

3.       Muntu eu udi ukengela bua kuitabuja Yezu Kilisto bu Musungidi wende.  


2.
MUENA  KILISTO  UDI  MUUJIBUE  NE  NYUMA  MUIMPE MU MOYO  WENDE   

 

Diba ditudi tuitabuja Yezu Kilisto bu Musungidi wetu, Nyuma Muimpe udi ulua kusomba munda muetu (Lomo 8:9). Kuikala muule ne Nyuma Muimpe kudi kabidi kuitabuja ne, Yezu Kilisto udi utuludika ne udi utulombola. Tudi tutekemena bukole buende bualu bua tuetu katuena ne bukole nansha. 

Mukanda wa Nzambi udi uleja patoke tshidi moyo muujibue ne Nyuma Muimpe:
"Mamuna a Nyuma adi: dinanga, disanka, ditalala, lutulu, luse, buimpe, lulamatu, kudipuekesha, kudikanda" (Galatia 5:22, 23).
"Kadi nuenu nenuangate bukole, panupuekela Nyuma Muimpe pambidi penu; nenuikale bamanyi banyi mu Yelushalema ne mu Yudaya yonso, ne mu Samaleya, ne kumfudilu kua buloba" (Bienzedi 1: 8).

Nuikale bamnaye ne,
1 Yezu Kilisto udi mu moyo wa muntu eu;
2 Yezu Kilisto udi ulombola moyo wa muntu eu.
3

Nunku muena Kilisto eu udi ne moyo anu bua kukuatshila Yezu Kilisto mudimu.

Patudi tulomba Kilisto ne, alombole mioyo yetu, tudi basue ne, Nzambi ikale ne disanka bua bualu buetu. Tudi ne dijinga dia kubala Mukanda wa Nzambi ne kutendelela Nzambi. Tudi kabidi ne dijinga dia kuambila bantu bakuabo bualu bua Kilisto ne kusomba n´abo muaba umue. Mu mioyo yetu mamuma a Nyuma neavulangane.

Malu aa neamueneke patoke mu moyo wa muena Kilisto bilondeshile: (1)   mushindu udiye udiunda mu ditabuja kudi Nzambi mu bualu ne bualu bonso bua moyo wende, ne (2) ku bukole bukaadi ditabuja diende. Muena Kilisto udi muujibue ne Nyuma Muimpe kena mupange mibi nansha, kadi mmwitabe, mujadike ne, Nzambi udi wenza mudimu mu moyo wende, ne, ne moyo wende.

Padi muena Kilisto kayi muujibue ne Nyuma Muimpe. Udi…


3.
  MUENA  KILISTO  WA  MU  MUBIDI

 

Muena Kilisto wa mu mubidi ngeu udi udifila bikole mu malu adi asankisha mubidi wende pa mutu pa kuenza malu adi asankisha Nzambi. Muena Kilisto wa mu mubidi udi bu muana mutekete udi wenza bu mudiye musue -- bu bantu ba pa buloba. Udi ne ditekemena mu bukole buende nkayende bua kudiundaye mu moyo wa bwena Kilisto.

Telejayi  tshidi  Mukanda  wa  Nzambi  wamba  bua  muena  Kilisto  wa  mu mubidi:
"Bulelela, bana betu, tshiakuakula n´enu bu mudibo bakula ne ban tu badi ne Nyuma wa Nzambi; nakuakula n’enu bu mudibo bakula ne bantu ba pa bulola ebu, bu mudibo bakula ne bana bakese mu ditabuja. Nakanupa mabele a kunua, tshiakanupa bia kudia bikole bualu bua kanuakadi mua kubidia nansha; to ne lelu kanuena mua kubidia to, bualu bua nutshidi nulonda malu a mubidi. Panutshidi ne mukau na matandu munkatshi muenu, kanuena numona ne, nutshidi nulonda malu a mubidi anyi?" (1 Kolinto 3:1-3).

Mu  Moyo  wa  muena  Kilisto  wa  mu  mubidi  mudi  malu  aa:

Misangu ya bungi,

-     Kena muitabuje Nzambi mene mene nansha.

-     Kena utumikila Diyi dia Nzambi to.

-         Kena ukuatshisha bakuabo bua bamanye Kilisto.

-         Kena ulomba Nzambi misangu ya bungi.

-         Kena wangata Mukanda wa Nzambi ne mushinga.

-         Udi wela menji anu ku malu mabi.

Udi mua,

-         Kunyingalala bua malu mabi ende.

-         Kuikala ne mukawu.

-         Kuditatshisha mu diela dia menji a bungi.

-         Kuditekesha mu maboko.

-         Kukolesha dilumbuluisha dia bantu bakwabo.

-         Kufika munda.

 

Monayi  ne,

1.       Yezu Kilisto utshidi anu Musungidi wende ne utshidi mu moyo wende.

2.       Muena Kilisto eu, udi musomba mpindieu, udilombuela moyo wende nkayende.

3.       Nyuma Muimpe utshidi anu mu moyo wa muena Kilisto eu; kadi kena uulombola nansha.

Bua bualu ebu …

Minga misangu muena Kilisto wa mu mubidi utu musue kusankisha Nzambi, kadi misangu ya bungi kena umona mua kúenza malu mimpe nansha (Lomo 7: 15, 18, 24). Ditekemena diende didi mu bukole buende nkayende, biabu buikale bukese. Bua bualu ebu, muena Kilisto wa mu mubidi kena ne disanka mu moyo wende nansha. Misangu ya bungi kena ne diakalenga mu moyo wende. Misangu mikuabo kena ne bienzedi bia muena Kilisto to.


Tshimfuanyi  kai  tshidi  tshileja  moyo  webe  ku  bisatu  ebi?

1.      Muntu udi kayi ne Kilisto mu moyo wende

 

2.      Muena Kilisto udi muujibue ne Nyuma Muimpe mu moyo wende

3.      Muena Kilisto wa mu mubidi

 

Udi musue kuikala muntu wa mushindu kayi?
Tudi tulua bena Kilisto diba ditudi tuitabuja Yezu Kilisto bu Musungidi wetu. Ne dib´edi mene tudi tuujibua tente ne Nyuma Muimpe anu ku ditabuja.

UDI  MUA  KUUJIBUA  NE  BUKOLE  BUA  NYUMA  MUIMPE   MPINDIEU 

Tudi buujibue ne nyuma Muimpe ku ditabuja. Ne amu ku ditabuja dietu, Yesu Kilisto udi ulua Musungidi wetu. Nanku, udi mua kuujibue ne nyuma Muimpe paundi utumikila ku di dia Nzambi ne ditabuja. 
Biwikala musue ne Nyuma wa Nzambi  alombole moyo webe ne akupeshe bukole,
 

1.     Bidi bikengela ne, wikale ne dijinga dia kuujibua ne Nyuma Muimpe (Matayo 5:6).  Kilisto kakubuela mu moyo webe bua kuulombola ku bukole nansha.

2.       Budi n´abu mbua kutonda mibi yebe yonso.  Itabuja ku mpala kua Nzambi ne udi muenji wa mibi.  Umusakidile bualu bua Kilisto wakafua anu bua kukjimijila mibi yebe (Kolosai 2: 13-15;  1 Yone 1:9). --  Ela mibi yebe nyima ne tumikila Nzambi.

3.       Lekela Yezu Kilisto bulombodi bua moyo webe (Lomo 6:13).  Bua kuikala ne moyo muujibue ne Nyuma Muimpe, bidi bikengele ne, witabuja bua, Yezu Kilisto alombole malu onso audi wenza.  Nzambi udi ne bua kulombola malu a mfualanga yebe, a mudimu webe, a malela ebe, a mu diku ne balunda bebe.

 

MUKENJI  NE  MULAYI  BIA  NZAMBI

EYEMENA NZAMBI BUA WIKALE MUUJIBUE NE NYUMA MUIMPE

Nzambi neakuuje (neakulombole ne neakukoleshe) ne Nyuma wende biwamueyemena.  Udi mua kuitabuja meyi aa bualu bua Mukanda wa Nzambi udi utuyisha bua: 

Mukenji Wende :
"Kanukuatshiki maluvu nansha : adi anu ne bua kunubueja mu njila wa tshiendenda; kadi nuujibue tente ne Nyuma Muimpe" (Efeso 5: 18). 

Nzambi udi musue bena Kilisto bikale buujibue ne Nyuma Muimpe. 

Mulayi wende: "Tudi ne dikima ku mpala kua Nzambi bua bualu ebu: tudi bajadike ne bituamulomba tshintu tshionso bu mudi diswa diende Yeye udi utumvuila.  Bu mutudi bamanye ne udi utumvuila patudi tumulomba tshintu, tudi bajadike kabidi ne, udi utupesha tshintu tshionso tshitudi tumulomba" (1 Yone 5: 14, 15). 

Mumwe ne Mukanda wa Nzambi udi ututumina diyi ne tuujibue ne Nyuma Muimpe, bualu bua ndisua dia Nzambi. Nunku nudi mua kuikala bamanye ne, Nzambi neanuuje ne Nyuma Muimpe panuamulomba ne ditekemena.  Udi ulaya bua kuenza malu onso panudi nualomba bu mudi disua diende.

KU  DITABUJA  TUDI  BUUJIBUE  NE  NYUMA  MUIMPE


Ditendelela didi tshilejelu tshia ditabuja.  Mushindu wa kutendelela udi nunku:

"Mukelenge Yezu, ndi n´ebe dijinga.  Ndi mumanye ne, nakudilombuela moyo wanyi nunku nakukuenzela bibi. Ndi ndekela mibi, ne ndi ndifila kuudi.  Tuasakidila bualu bua wakamfuila luse mu lufu luebe pa mutshi mutshiamakane.  Suaku, Mukelenge, unguuje ne Nyuma Muimpe webe.  Udi undomba ne udi undaya ne, neungenzele nunku binakulomba ne ditabuja.  Bua kukuleja patoke ditabuja dianyi, ndi nkuela tuasakidila bualu bua wakunguuja ne Nyuma Muimpe ne bualu bua udi ulombola moyo wanyi.  Amen".

Mu mutshima webe udi ujinga kuujibua nunku anyi ?  bua wewe kuenda ne bukole mu bulombodi bua Nyuma Muimpe, udi musue nunku anyi? Biwikala muitabe, ndi nkulomba ne utendelele nunku mpindieu.

UDI  MUA  KUMANYA  MUNYI  NE  UDI  MUUJIBUE
NE  NYUMA  MUIMPE
 

Wakulomba Nzambi bua akuuje ne Nyuma Muimpe anyi? Udi mumanye ne, mpindieu udi mumane kuujibua ne Nyuma Muimpe anyi?  Udi mua kujadika bualu ebu biwabala mukenji wende (mu Efeso 5:18) ne mulayi wende (mu 1 Yone 5:14,15). 

Kudi matuku awadiunvua pa buipi mene mene ne Nzambi.  Makuabo matuku neudiunvue kule n´ende. Malu a mu mutshima (les sentiments et les émotions) adi ashintuluka bilondeshile malu adi atukuata.  Kakwena bualu tusakidile Nzambi, ne tueyemene Diyi diende, katutangidi malu a mu mitshima yetu.

Udi mua kujadika dinanga ne luse lua Nzambi ku ditukt ku dituku. Nyuma Muimpe neakuleje malu audi ne bua kushintulula mu moyo webe. Malu aa neamueneke kuudi diba dewenda ne Mukelenge ne diwakeba kumusankisha. Diba diudi wenzela Nzambi bibi (mu diakula diebe, mu menji ebe anyi mu bienzedi biebe), umusakidile, bualu bua wakaku fwila luse diba diakafua Yezu Kilisto ku mutshi mutshiamakane. Wikale ne ditabuja mu dinanga ne mu luse luende. Ikale mulunda webe kashidi.

KUIKALA  MUUJIBUE  NE  NYUMA  MUIMPE   TSHIENDELELE 

Nyuma Muimpe katu upatuka mu moyo wa muena Kilisto nansha.  Nansha bikale nanku, bibi bikengela ne, umulombe alombole moyo webe dituku dionso.  Udi mua kupingana kabidi mu bulombodi bua moyo webe mu dienza dia malu mabi, mu dibenga kutumikila Nzambi mu diela dia menji, mu meyi ne mu bienzedi.  Biumvwa mwa kwenza nanku, bidi bikengela ne, upuyakane mu nyuma. 

MUFUANU  WA  MUDIMU  WA  NYUMA 

Mubidi wetu udi upatula mupuya mubi patudi tupuyakana. Bu mudi lupepele luimpe luipata lupepele lubi, dipuyakana mu nyuma didi dikukwatshisha bua wewe kudilengeja ku mesu kua Nzambi webe, ne bua wewe kuujibua kabidi ne Nyuma Muimpe wa Nzambi.

MMUNYI  MUUDI  MUA  KUUJIBUA  NE  NYUMA  MUIMPE? 

1.       Utonde mibi yebe kudi Nzambi (1 Yone 1:9).  Umusakidile bua luse luende, ne wele mibi yebe nyima kashidi.

2.       Ulombe Yezu bua angate kabidi bulombodi bua moyo webe (Lomo 6: 13). Udifile kudi Nyuma Muimpe bua akuuje kabidi.  Uvuluke mukenji wende udi mu Efeso 5:18 ne mulayi wende udi mu 1 Yone 5:14,15.

Upuyakane mu nyuma misangu yonso idi Nyuma Muimpe ukuleja bubi buebe, nunku moyo webe newikale bua butumbi bua Nzambi; newikale kabidi muule ne disanka ne dibingishibua.  Ulekele Nyuma Muimpe akulombole ku diba ne diba, dituku dionso dia moyo webe.

KUIKALA  NE  MOYO  MUUJIBUE  NE NYUMA  MUIMPE

 Paudi ne moyo mu Yezu Kilisto, Nzambi udi ukudimuna moyo webe; diba diudi ulekeela Nyuma Muimpe bulombodi bua moyo webe,  

1.       Mamuma a Nyuma neamueneke patoke mu moyo webe misangu yonso (Galatia 5:22,23).

2.       Milombo yebe neyikale ne bukole (Yakobo 5:16).

3.       Neudiundishe dimanya diebe dia Mukanda wa Nzambi (2 Timote 3:16,17).

4.       Neupete bukole bua Nzambi bua wewe kumanyisha bakuabo Lumu Luimpe (Bienzedi 1:8).

5.       Neupete bukole bua Nzambi bua wewe kupita mateta ne mibi bukole (1 Kolinto 10:13). 

Wikale ne ditabuja mu Nzambi ne mu milayi yende idi mu Mukanda wa Nzambi.  Anu ku ditabuja nkudi muena Kilisto mua kuujibua ne Nyuma Muimpe mu moyo wende.

EKELEZIA  NTSHINTU  TSHIA  MUSHINGA  MUKOLE

 Padi bipese bia nkunyi bia bungi bikale bionso mu kapia, bidi bitemesha kapia kakole.  Kadi padibi bitangalaja, kapia kadi kabanga kujima.  Mmomumue kabidi, newikale ne lutatu lunene biwasua kudiunda nkayebe mu bualu bua Nzambi.  Bidi bikengela ne wewe udisangishe ne bantu bakuabo badi bitabuja Yezu Kilisto bu Musungidi ne Mukelenge wabu.  Bua ebu, udi ne bua kubuela mu Ekelezia udi benayi bitabuja ne, Mukanda wa Nzambi udi wamba bulelela, banemeka ne bakukuila Yezu Kilisto (Ebelu 10:25).

Bikala kakanda aka kakukuatshishe, mbimpe ukabadishe muntu mukuabo.
Biwikila musue kuebeja malu makuabo, udi mua kufundila: 

Dibala dia kakanda aka didi dianyishibue.  Kadi bua kulama buakane bua meyi aa ne bua kubenga kujimija meyi a ku mbangidilu, difundulula dia kakanda aka kajima anyi dia meyi makese, ndikandikibue kudi eu yonso udi kayi mupete mukanda wa dianyisha dia President kudi Campus pour Christ.

Kakanda aka nkafundibue kudi Dr. William R. Bright.

Ministère du Campus pour Christ International
B.P. 7721, Kinshasa 1, ZAIRE
14è Rue nº  49, Limete